ಇರಾನ್ ಅಬ್ಬರಕ್ಕೆ ನಲುಗಿದ ಅಮೆರಿಕ: ಕೇವಲ 4 ದಿನಗಳಲ್ಲಿ ಯುಎಸ್​ ಕಳೆದುಕೊಂಡ ಯುದ್ಧೋಪಕರಣಗಳ ಮೌಲ್ಯ ಎಷ್ಟು ಗೊತ್ತಾ..! US Military Loss

ಅಮೆರಿಕಕ್ಕೆ ಸಂಭವಿಸಿದ ನಷ್ಟದಲ್ಲಿ ಅತಿ ದೊಡ್ಡ ಹೊಡೆತ ಬಿದ್ದಿರುವುದು ಕತಾರ್‌ನಲ್ಲಿರುವ ಅಲ್ ಉದೈದ್ ವಾಯುನೆಲೆಯಲ್ಲಿ. ಇರಾನ್ ನಡೆಸಿದ ಕ್ಷಿಪಣಿ ದಾಳಿಯಲ್ಲಿ ಅಮೆರಿಕದ ಅತ್ಯಾಧುನಿಕ AN/FPS-132 ಅರ್ಲಿ ವಾರ್ನಿಂಗ್ ರಾಡಾರ್ ವ್ಯವಸ್ಥೆಯು ಸಂಪೂರ್ಣವಾಗಿ ಜಖಂಗೊಂಡಿದೆ. ಇದರ ಅಂದಾಜು ಮೌಲ್ಯ 1.1 ಬಿಲಿಯನ್ ಡಾಲರ್. ಶತ್ರುಗಳ ಕ್ಷಿಪಣಿಗಳನ್ನು ಮೊದಲೇ ಪತ್ತೆಹಚ್ಚುವ ಈ ವ್ಯವಸ್ಥೆಯ ನಾಶವು ಅಮೆರಿಕದ ರಕ್ಷಣಾ ಕವಚಕ್ಕೆ ಬಿದ್ದ ದೊಡ್ಡ ರಂಧ್ರವಾಗಿದೆ.

ಭಾನುವಾರ ಕುವೈತ್‌ನಲ್ಲಿ ನಡೆದ ಒಂದು ವಿಲಕ್ಷಣ ಘಟನೆಯಲ್ಲಿ ಅಮೆರಿಕ ತನ್ನ ಮೂರು F-15E ಸ್ಟ್ರೈಕ್ ಈಗಲ್ ಯುದ್ಧ ವಿಮಾನಗಳನ್ನು ಕಳೆದುಕೊಂಡಿದೆ. ಕುವೈತ್ ವಾಯು ರಕ್ಷಣಾ ಪಡೆಯು ಇರಾನ್ ಕ್ಷಿಪಣಿ ಎಂದು ತಪ್ಪಾಗಿ ಭಾವಿಸಿ ಅಮೆರಿಕದ ವಿಮಾನಗಳ ಮೇಲೆ ಗುಂಡಿನ ದಾಳಿ ನಡೆಸಿದೆ. ಅದೃಷ್ಟವಶಾತ್ ಆರು ವಿಮಾನ ಸಿಬ್ಬಂದಿಗಳು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ, ಆದರೆ 282 ಮಿಲಿಯನ್ ಡಾಲರ್ ಮೌಲ್ಯದ ವಿಮಾನಗಳು ಸುಟ್ಟು ಕರಕಲಾಗಿವೆ.

THAAD ರಾಡಾರ್ ನಾಶ: ಯುನೈಟೆಡ್ ಅರಬ್ ಎಮಿರೇಟ್ಸ್‌ನ ಅಲ್-ರುವೈಸ್ ಕೈಗಾರಿಕಾ ನಗರದಲ್ಲಿ ನಿಯೋಜಿಸಲಾಗಿದ್ದ ಅಮೆರಿಕದ ಹೆಮ್ಮೆಯ ತದ್​ ಕ್ಷಿಪಣಿ ವಿರೋಧಿ ವ್ಯವಸ್ಥೆಯ AN/TPY-2 ರಾಡಾರ್ ಅನ್ನು ಇರಾನ್ ಧ್ವಂಸಗೊಳಿಸಿದೆ. ಇದರ ಮೌಲ್ಯ 500 ಮಿಲಿಯನ್ ಡಾಲರ್ ಎಂದು ಅಂದಾಜಿಸಲಾಗಿದೆ.

ಬಹ್ರೇನ್ ನೌಕಾ ನೆಲೆ: ಬಹ್ರೇನ್‌ನಲ್ಲಿರುವ ಅಮೆರಿಕದ 5ನೇ ಫ್ಲೀಟ್ ಪ್ರಧಾನ ಕಚೇರಿಯ ಮೇಲೆ ನಡೆದ ದಾಳಿಯಲ್ಲಿ ಎರಡು ಸ್ಯಾಟಲೈಟ್ ಕಮ್ಯುನಿಕೇಷನ್ ಟರ್ಮಿನಲ್‌ಗಳು ಮತ್ತು ಹಲವಾರು ಕಟ್ಟಡಗಳು ನಾಶವಾಗಿವೆ.

ಇರಾನ್ ಕೇವಲ ಒಂದು ದೇಶಕ್ಕೆ ಸೀಮಿತವಾಗದೆ, ಮಧ್ಯಪ್ರಾಚ್ಯದಾದ್ಯಂತ ಹರಡಿರುವ ಅಮೆರಿಕದ ಏಳು ಪ್ರಮುಖ ಮಿಲಿಟರಿ ನೆಲೆಗಳನ್ನು ಗುರಿಯಾಗಿಸಿಕೊಂಡಿದೆ.

ಬಹ್ರೇನ್: 5ನೇ ಫ್ಲೀಟ್ ಪ್ರಧಾನ ಕಚೇರಿ.

ಕುವೈತ್: ಕ್ಯಾಂಪ್ ಅರಿಫ್ಜನ್, ಅಲಿ ಅಲ್ ಸಾಲೆಮ್ ವಾಯುನೆಲೆ ಮತ್ತು ಕ್ಯಾಂಪ್ ಬುಹ್ರಿಂಗ್.

ಇರಾಕ್: ಅರ್ಬಿಲ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ನೆಲೆ.

ಯುಎಇ: ಜೆಬೆಲ್ ಅಲಿ ಬಂದರು.

ಕತಾರ್: ಅಲ್-ಉದೈದ್ ವಾಯುನೆಲೆ.

ಮಿಲಿಟರಿ ನೆಲೆಗಳ ಜೊತೆಗೆ ಸೌದಿ ಅರೇಬಿಯಾ, ಕುವೈತ್ ಮತ್ತು ಯುಎಇಯಲ್ಲಿರುವ ಅಮೆರಿಕದ ರಾಯಭಾರ ಕಚೇರಿಗಳ ಮೇಲೆಯೂ ಇರಾನ್ ಡ್ರೋನ್ ದಾಳಿ ನಡೆಸಿದೆ.

ರಿಯಾದ್: ಇಲ್ಲಿನ ರಾಯಭಾರ ಕಚೇರಿಯ ಮೇಲಿನ ದಾಳಿಯಲ್ಲಿ ಸಿಐಎ ಸ್ಟೇಷನ್ ಮೇಲೆ ಹೊಡೆತ ಬಿದ್ದಿದೆ ಎಂದು ವರದಿಯಾಗಿದೆ.

ಕುವೈತ್ ಸಿಟಿ: ಇಲ್ಲಿನ ಕಚೇರಿಯನ್ನು ಬ್ರೂಟಲ್ ದಾಳಿಯ ನಂತರ ಮುಚ್ಚಲಾಗಿದ್ದು, ಅನಿವಾರ್ಯವಲ್ಲದ ಸಿಬ್ಬಂದಿಯನ್ನು ಸ್ಥಳಾಂತರಿಸಲಾಗಿದೆ.

ದುಬೈ: ಕಾನ್ಸುಲೇಟ್‌ನ ಪಾರ್ಕಿಂಗ್ ಪ್ರದೇಶಕ್ಕೆ ಡ್ರೋನ್ ಅಪ್ಪಳಿಸಿ ಬೆಂಕಿ ಕಾಣಿಸಿಕೊಂಡಿದೆ.

ಅಮೆರಿಕವು ಈ ನಷ್ಟವನ್ನು ಹೇಗೆ ತುಂಬಿಕೊಳ್ಳುತ್ತದೆ ಮತ್ತು ಇರಾನ್‌ನ ಈ ಆಕ್ರಮಣಕಾರಿ ನೀತಿಗೆ ಹೇಗೆ ಪ್ರತಿಕ್ರಿಯಿಸುತ್ತದೆ ಎಂಬುದು ಈಗ ಜಾಗತಿಕ ಕುತೂಹಲಕ್ಕೆ ಕಾರಣವಾಗಿದೆ. ಒಂದು ಕಡೆ ಅಲಿ ಖಮೇನಿ ಅವರ ಹತ್ಯೆಯ ನಂತರ ಇರಾನ್ ರೊಚ್ಚಿಗೆದ್ದಿದ್ದರೆ, ಮತ್ತೊಂದೆಡೆ ಅಮೆರಿಕ ತನ್ನ ಬಿಲಿಯನ್ ಗಟ್ಟಲೆ ಮೌಲ್ಯದ ಆಸ್ತಿಯನ್ನು ಉಳಿಸಿಕೊಳ್ಳಲು ಹೆಣಗಾಡುತ್ತಿದೆ,(ಏಜೆನ್ಸೀಸ್).